venres, 29 de xaneiro de 2021

Utopías [DEBUXO]

Como a nosa fantástica bibliotecaria nunha entrada neste blog xa se fixo eco do día da ilustración, que é este sábado, e que este ano homenaxea a ilustradora Lolita Díaz Baliño, eu continuo ca temática aportando unha entrevista de  hai varios días. O domingo 24 o programa UTOPÍAS de Rne3 tratou este tema co título "O mundo da Ilustración". Os invitados ao programa estableceron entre eles un diálogo ao redor do mundo creativo da ilustración, reflexionando sobre o momento actual polo que pasa esta disciplina artística e comentando as súas experiencias profesionais. Os catro invitados son ben coñecidos neste eido e as súas carreiras profesionáis moi admirables:

VÍCTOR COYOTE (Tui 1958)

O que fora lider do grupo "Los Coyotes" e  pioneiro do rock latino en España é un magnífico ilustrador. Desde o meu punto de vista é un dos mellores cartelistas deste país. Tiven a sorte de coñecelo e expoñer a súa obra en Vigo,  "Gira de Posters" no ano 2013. Tamén presentou en Vigo o libro "tío Budo" editado pola editorial de Logroño Fulgecio Pimentel, unha editora que está sacando ao mercado verdadeiras xoias como Hechizo Total, de Simon Hanselmann, o Terry, una antoloxía de historietas imprescindible. Víctor Coyote Abundancia Aparicio é un artista total, músico, pintor, debuxante de BD, escritor, realizador de videoclips e tamén actor... ademáis dun tipo xenial.

2011. Marzo galego

xoves, 28 de xaneiro de 2021

Antonina Kadyrova: Que Fermoso É Este Mundo! [BIBLIOTECA]


Hoxe subimos ao noso blog a curtametraxe Que fermoso é este mundo! que é a carta de presentación da nosa antiga alumna de artesanía do coiro Antonina Kadyrova, artesá rusa arraigada en España. Hai uns meses gravou este vídeo de presentación, e tamén de homenaxe á Escola onde recibiu a formación necesaria para o desenvolvemento da súa creatividade. O traballo de Antonina caracterízase por ter un estilo moi persoal que fusiona a artesanía de coiro tradicional e a pintura rusa chamada Jojlomá do século XVII.

mércores, 27 de xaneiro de 2021

Peche Temporal da EMAO pola Crise Epidemiolóxica Derivada do COVID-19 [ADMINISTRACIÓN]

 

Seguindo instrucións da Concellería de Educación e conforme á ORDE do 26 de xaneiro de 2021 pola que se establecen medidas de prevención específicas  como  consecuencia  da  evolución da situación epidemiolóxica derivada do COVID-19 na Comunidade Autónoma de Galicia, comunicámoslle que a partir da data de hoxe, 27 de xaneiro, suspéndense ata o 17 de febreiro de 2021 as clases presenciais na Escola Municipal de Artes e Oficios de Vigo.
O/a mestre/a da especialidade na que está matriculado/a, porase en contanto con vostede para indicarlle as actividades que, durante este tempo, se proporán de xeito non presencial mediante o uso dos medios e ferramentas online e de comunicación do que dispoña.
A reanudación das clases presenciais seralle comunicada por este mesmo medio.

luns, 25 de xaneiro de 2021

Día da Ilustración 2021 [BIBLIOTECA]

Cartel do ilustrador Manuel Cráneo

 

O Día da Ilustración deste ano 2021 celébrarase o vindeiro sábado 30 de xaneiro, coincidindo co día do nacemento de Castelao. Este ano estará dedicado por primeira vez a unha muller ilustradora, Lolita Díaz Baliño. 

A iniciativa, en marcha desde 2014, pretende "promover a obra dos ilustradores galegos de hoxe en día, así como reivindicar o traballo de profesionais clásicos, en moitas ocasións pioneiros", para o que se conmemora en cada edición a un ilustrador histórico galego. A homenaxeada este ano é a ilustradora, pintora e docente, Lolita Díaz Baliño, tía do intelectual galego Isaac Díaz Pardo. Unha artista pioneira que foi unha das primeiras mulleres en ingresar na Real Academia Galega de Belas Artes, en 1938.

 Para entender o traballo da ilustradora, e co obxectivo de dar a coñecer a ilustradores galegos actuais, a Asociación Galega de Profesionais da Ilustración (Agpi) pediulle a catro artistas galegas, Lida Cao, Nuria Figueiredo, Iria Ribadomar e Laura Romero, que "ilustren" aqueles aspectos "que fosen inspiradores para elas" de Díaz Baliño. Estes traballos, así como os catro vídeos que documentan o proceso de creación destas ilustracións, pódense ver na páxina web oficial do Día da Ilustración 2021. Tamén está dispoñible un vídeo explicativo sobre a obra da homenaxeada desta edición, o programa completo coas actividades que se celebrarán ao longo desta semana e o cartel conmemorativo.

Será na rede de bibliotecas públicas e nas escolas de belas artes onde se desenvolvan gran parte das actividades do Día dá Ilustración, algunhas das cales se poderán seguir a través da páxina web oficial. Entre elas, a exposición na Biblioteca de Galicia "Lolita Díaz Baliño. A discreción imposta dunha grande artista", que se inaugurará o 30 de xaneiro e na que se poderán ver parte dos fondos propios da biblioteca, así como outros cedidos temporalmente pola fundación Isaac Díaz Pardo.

sábado, 23 de xaneiro de 2021

60. Yves Klein ¿que ten medo ao lume? Cap: 2 [PINTURA]

Seguindo o fío da obra de Leopoldo Novoa, hoxe falaremos de Yves Klein (Niza 1928 - París 1962), fundador do movemento Novo Realismo (con matices neoadianos), que consegue coa desmaterialización da arte (traballando co etéreo e o baleiro, grazas ao seu profundo coñecemento da filosofía zen), para derreter os límites entre a vida e a arte.

O texto de hoxe, está escrito polo magnífico crítico de arte Pierre Restany, amigo e profundo coñecedor da obra do artista que...¡SALTOU AO BALEIRO!.

venres, 22 de xaneiro de 2021

O antigo cárcere [DEBUXO]

Un dos exercicios que estamos a realizar no abraoiro de Debuxo e que nos vai servir como preparación e entrenamento da man e do ollo, para que posteriormente, cando teñamos mellor tempo,  sair a rúa a debuxar in situ, é o seguinte:

Realizar o alzado de fachadas de edificios emblemáticos de Vigo a partir de fotografías históricas e planos dos alzados que se proxectaran no seu momento. A Biblioteca da EMAO conta con unha chea de libros que documentan o Vigo histórico, tanto o que se perdeu como o que permanece. Eses libros son uns documentos maravillosos que nos permiten a través das súas imaxes realizar esta tarefa.

Estamos exercitando o trazo e a proporción, collendo esas imaxes, estudandoas, coñecendo a arquitectura do Vigo histórico, dos arquitectos que o representan e o seu legado. Un deses edificios cos que estivemos a traballar é o actual MARCO, onde se situaba o antigo cárcere.


venres, 15 de xaneiro de 2021

59. Leopoldo Novoa. Quen ten medo ao lume? Cap: 1. [PINTURA]

Con motivo do recente centenario do nacemento do artista Leopoldo Nóvoa, o Museo de Pontevedra dedícalle unha extraordinaria e extensa exposición, na que cómpre destacar o alto nivel comisarial da exposición, comisariada por Rosario Sarmiento, feita con agarimo. , profesionalidade e coñecemento exquisito. Contén máis de cincuenta obras que recollen os diferentes momentos da súa carreira creativa: Leopoldo Nóvoa, 1919-2019.

Engadiremos a esta exposición unha serie de capítulos onde relacionamos a obra de Leopoldo con outros grandes artistas contemporáneos, que traballaron na mesma dirección.



luns, 11 de xaneiro de 2021

Xa temos Kartoffel [DEBUXO]

 O pasado ano por estas datas presentamos na EMAO o proxecto de crowdfunding dos irmáns Trigo realizado a través da plataforma de Verkami. Tratábase de Kartoffell, unha historia narrada en formato de novela gráfica, segunda parte daquela que no 2015 levara o premio Castelao pola Deputación da Coruña e que fora editada pola mesma. Entonces o título era Lobada. As dúas historias parten na seguinte pregunta.. ¿Qué pasaba no Vigo dos anos 40, en plena  Segunda Guerra Mundial, cando o porto era base dos submarinos alemáns?. Como dous detectives, os autores, comenzan a atar cabos e a montar un puzzle  logo de 75 anos que se materializa nesta historia.

O proxecto de Xosé e Ramón saiu adiante grazas a colaboración de moita xente que admiramos o traballo destes dous irmáns, e o libro xa ten formato físico desde o mes de decembro. A idea era presentar novamente este traballo na EMAO, pero os protocolos covid19 complican este tipo de presentacións polo que o deixaremos para máis adiante. Polo pronto Ramón montou no Nadal unha pequena exposición no Espazo A Madriña que é onde se poden recoller os exemplares dos colaboradores do proxecto. Para os que non colaboraron no crowdfunding, o libro pódese mercar en varias librerías de Vigo, como Versus, Librouro, Norma Cómics e Banda Deseñada.



venres, 8 de xaneiro de 2021

Se non o entendes, fágoche un plano. [CAIM ZANFONA]

"Longitud de onda" é un programa da radio clásica de RTVE no cal abordan moitos dos aspectos musicais explicados dende unha perspectiva científica.

Aquí vos deixo o enlace para escoitar este interesantísimo programa adicado, desta volta. á xeometría dos instrumentos musicais.

https://www.rtve.es/alacarta/audios/longitud-de-onda/geometria-musica-07-01-21/5754162/