Utopías [DEBUXO]

Como a nosa fantástica bibliotecaria nunha entrada neste blog xa se fixo eco do día da ilustración, que é este sábado, e que este ano homenaxea a ilustradora Lolita Díaz Baliño, eu continuo ca temática aportando unha entrevista de  hai varios días. O domingo 24 o programa UTOPÍAS de Rne3 tratou este tema co título "O mundo da Ilustración". Os invitados ao programa estableceron entre eles un diálogo ao redor do mundo creativo da ilustración, reflexionando sobre o momento actual polo que pasa esta disciplina artística e comentando as súas experiencias profesionais. Os catro invitados son ben coñecidos neste eido e as súas carreiras profesionáis moi admirables:

VÍCTOR COYOTE (Tui 1958)

O que fora lider do grupo "Los Coyotes" e  pioneiro do rock latino en España é un magnífico ilustrador. Desde o meu punto de vista é un dos mellores cartelistas deste país. Tiven a sorte de coñecelo e expoñer a súa obra en Vigo,  "Gira de Posters" no ano 2013. Tamén presentou en Vigo o libro "tío Budo" editado pola editorial de Logroño Fulgecio Pimentel, unha editora que está sacando ao mercado verdadeiras xoias como Hechizo Total, de Simon Hanselmann, o Terry, una antoloxía de historietas imprescindible. Víctor Coyote Abundancia Aparicio é un artista total, músico, pintor, debuxante de BD, escritor, realizador de videoclips e tamén actor... ademáis dun tipo xenial.

2011. Marzo galego

SONIA PULIDO (Barcelona 1973)

É unha ilustradora moi versátil. Leva ilustrando desde os anos 90 para publicacións españolas como El País Semanal, Rockdelux ou a revista infantil Tretzevents, pero tamén para outras tantas internacionáis como New Yorker ou The New York Times. Como historietista publicou a súa primeira novela gráfica "Puede que esta vez" con Ediciones Sinsentido e no 2010 chegou  "Duelo de Caracoles". Actualmente Sonia Pulido é a nosa flamante Premio Nacional de Ilustración 2020. Bravo!!

Ilustración para NY Times

ÁLVARO PÉREZ-FAJARDO (Madrid 1973)

É un ilustrador coñecido sobre todo polo seu vínculo co mundo do Rock & Roll sendo este ámbito no que se atopa como peixe na auga. Rexenta co seu irmán, o fotografo Juan Pérez-Fajardo, o estudo de deseño The Fly Factory. Ten deseñado portadas de discos e cartaces de concertos para músicos nacionais como Sabina, Bumbury, Los Coronas, Depedro, Amaral e outros internacionais como Redd Cross ou Lucinda Willians. A súa obra está exposta na galería "La Fiambrera" de Madrid, especializada na promoción de artistas e ilustradores vinculados ao  Arte pop, Surrealismo pop  e  Arte urbano.

Chicas- Cinta Casette. Serigrafía

RUTH LÓPEZ-DIÉGUEZ.

Xunto ca súa socia Maite Valderrama, comanda a galería madrileña "La Fiambrera". Sempe que baixo a Madrid non me perdo visitar este espazo xa que sempre atopo algo interesante. Recordo unha exposición hai anos do artista californiano Shag, que é un referente Pop para moitos ilustradores desde os anos 90 e que ten un estilo cool moi recoñecible e copiado. Tamén nesta galería expón a sua obra o gran Roberto Argüelles, ilustrador vigués ben coñecido no circuito do Rock. Penso que nese circuito non hai grupo vigués ao que Roberto non lle fixera un cartaz ou unha portada.

Os Ramones de Argëlles

Despois desta pequena presentación deixo o enlace do programa de RNE3, Utopías, e un pequeno guiño ao gran Víctor con un dos seus "Ruido bajito" que fixera no Festival de Cans. Espero que disfrutedes deste xeito radiofónico e musical un pouco máis do día da Ilustración.

"EL MUNDO DE LA ILUSTRACIÓN". Utopías