Presentación da especialidade Moda e Confección [MODA]

Un pouquiño de Historia

Coser, durante moitos séculos, foi unha tarefa máis das que o home (mellor dito, as mulleres) tiña que realizar pola súa propia supervivencia e a da súa familia.

O oficio de xastre tomou especial importancia na Idade Media, coa organización dos oficios en gremios. O labor de facer pezas de vestir era tan complexo que os padróns e as ferramentas quedaban como a máis valiosa herdanza que un fillo podía recibir de seu pai. Este feito danos unha idea da importancia que ten saber cortar e coser pezas de roupa.

Coa chegada de publicacións de moda a mediados do século XIX a ensinanza do corte e confección puido chegar a máis fogares animado tamén pola chegada da maquina de coser sendo estes feitos o principio da democratización da moda.

Mentres todo isto acontecía, a Escola Municipal de Arte e Oficios de Vigo incorporou á sección da Muller, a especialidade de "Corte e Confección de vestidos e manexo da Máquina de coser".

Nestas clases as alumnas aprendían a coser a man, a cortar e a manexar a máquina de coser que a principios de século empezaba a ser unha ferramenta indispensable nos fogares. Aquí formábanse costureiras e modistas profesionais co aliciente de proporcionar a tantas mulleres un oficio.

Fotos do arquivo da EMAO

A especialidade, hoxe en día, denomínase Moda e Confección, pero a esencia segue sendo a de formar homes e mulleres na arte da costura.

¿Que se aprende? 

Partimos da premisa de que o alumno nos sabe nada polo que os primeiros días os adicamos a coser a man, coñecer e manexar a máquina de coser, as ferramentas que se necesitan, e unha vez dominada esa parte comezamos coa patronaxe,e a confección de prendas sinxelas.

A patronaxe e unha parte fundamental da especialidade; como ben dixo Cristobal Balenciaga: un bo modisto ten que ser arquitecto nos padróns.

Pouco a pouco imos incorporando padróns máis complexos de todo tipo de prendas, maioritariamente de muller; saias, corpos, camisas, vestidos, pantalóns, chaquetas e abrigos.

Prestamos especial atención a aprender a facer bos acabados nas pezas, utilizando diferentes técnicas de confección profesionais. 

Traballos de alumnos de Básico e Superior

 

Tamén adicamos tempo ao recoñecemento de tecidos, os seus nomes, os seus usos e como diferencialos para poder facer unha boa elección á hora de deseñar... e é que tamén deseñamos!

                                                                                            

                                     
O curso conta coa complementaria de Debuxo. Son 30 horas nas que o debuxo se pon ao servizo da moda, xa que é imprescindible para poder expresarnos e é o vehículo para realizar os nosos padróns. O ensino non quedaría completa sen nosa outra complementaria; Historia da Moda. Outras 30 horas nas que se fai un repaso pola historia da indumentaria en occidente.

¿Canto dura o curso?

Moda e Confección diferencia entre itinerario de mañá e de tarde; pola mañá son dous días á semana, dúas horas cada día durante tres anos (Iniciación, Perfeccionamento I, Perfecccionamento II, 430 horas en total)

Pola tarde tamén son dous días a semana, 5 horas cada día durante dous anos (Básico e Superior), ten unha duración total de 700 horas máis 60 horas de complementarias ( 30h de debuxo e 30h de Historia da Moda)

Nos dous itinerarios abordase a mesma teoría coa diferencia do tempo adicado á práctica no taller.

Independentemente do itinerario escollido, o alumno ten a opción, unha vez terminada a especialidade , de realizar o curso Avanzado; un curso de 70 horas en formato de titoría onde desenvolve un proxecto propio enfocado cara á investigación, creación, ampliación de coñecementos... 

¿Como se accede?

Todos os anos polo mes de xuño, comenza o período de preinscripción que dura ata os primeiros días de setembro. Se a demanda de alumnos é maior cás prazas ofertadas, realizarase unha proba de acceso onde non se valorarán coñecementos sobre a especialidade, senon a actitude e aptitude para ela.

Ola, son Emma Pintos, a profesora de Moda e Confección e espero que con esta entrada no blogue puideses ver o que facemos e como o facemos no taller da EMAO.