Presentación da especialidade de CAIM Gaita [CAIM GAITA]

Visitas escolares

Logo do parón das ensinanzas presenciais, obrigado polo COVID-19, atopámonos preparando o comezo do próximo curso, con especial atención ás medidas de prevención da saúde, coa pretensión de ofrecer as nosas ensinanzas nun entorno seguro e de protección, tanto para alumnos como para todo o persoal da escola.
Aínda que para o próximo curso se prevé unha menor oferta de prazas debido á repetición de curso do alumnado que xa estaba matriculado na especialidade e perdeu a maior parte do curso presencial, esta é unha situación conxuntural que esperamos desapareza nos vindeiros cursos.

O acceso ás prazas vacantes será, como é habitual, mediante unha proba de acceso no caso de que as solicitudes superen a oferta de prazas, e con preferencia para as personas empadroadas na cidade de Vigo (non excluinte). Para información sobre a oferta e os prazos correspondentes, podedes consultar a convocatoria neste enlace convocatoria 2020/21.

Os dous itinerarios posibles son:
En horario de tarde, a formación desenvólvese durante dous cursos (Básico e Superior), e conta con 10 horas semanais de obradoiro repartidas en dúas tardes, e as asignaturas complementarias de Debuxo técnico, Iniciación á interpretación, Historia da música galega (on line) e Lingüaxe musical.
En horario de mañá, a formación desenvólvese durante tres cursos (Iniciación, Perfeccionamento I e Perfeccionamento II), e conta con 8 horas semanais de obradoiro, impartidas os venres.

Curso avanzado.
Trátase dunha extensión dun curso máis logo de ter rematado o itinerario correspondente, no que o alumno voluntariamente elabora un proxecto de interese para a especialidade, que pode ser do ambito da investigación, creación, mellora dos instrumentos, etc., que presentará para a súa valoracion, e no seu caso aprobación, pola comisión correspondente. Este curso consta de dúas horas semanais presenciais/titoría.

Acceso a niveis superiores por convalidación
De xeito excepcional poderán os alumnos (tanto de novo ingreso como matriculados) solicitar a convalidación dun nivel completo dunha especialidade. Para poder optar a esta posibilidade deberá o interesado presentar unha solicitude motivada na que amose que posúe os coñecementos, aptitude e experiencia abonda para saltar un nivel. A solicitude será resolta pola dirección do Centro previo informe do mestre da especialidade e da xefatura de estudos. Se é o caso, poderá esixirse unha proba práctica previa. Esta posibilidade está condicionada á existencia de vacantes no curso que se solicite

Tanto se pretendes facer da artesanía musical o teu oficio, coñecendo técnicas construtivas, os mellores materiais, os problemas que xorden e as súas solucións; como se es afeccionado/a á música tradicional, tocas algún instrumento e queres tocar cunha gaita feita por ti mesmo/a, ou simplemente sentes curiosidade polas interioridades do instrumento, e decídeste a estudar con nós, poderás aprender todo o necesario para a construción de gaitas, pitos e requintas:

• Construción de palletas e pallóns de cana
• Diferenciación e elección das mellores madeiras
• Deseño do instrumento
• Cilindrado e calibrado das madeiras
• Preparación e colocación de anelas de madeira, sintéticas ou de metal
• Torneado e lixado
• Colocación e axuste das cortizas (naturais e sintéticas)
• Acabado do instrumento (aceites, ceras e vernices)
• Montaxe do fol
• Empalletado e afinado
• Elaboración do "voicing" do Pito pastoril (bisel, labios, canle, bloque)
• Elaboración da cabeza e chaves da requinta

furado dunha peza do ronco

Canle portavento e bisel

furado dunha peza do ronco

Para isto empregaremos unha metodoloxía baseada maioritariamente na demostración práctica por parte do mestre, previa explicación teórica, e seguimento individual do traballo de cada alumno, xa que as diferentes habilidades de cada alumno fai que cada un siga o seu propio ritmo de traballo.

Repuxado de anela de prata

Na nosa aula-obradoiro contamos con tódolos recursos necesarios para a realización dos traballos,
achegando a maquinaria necesaria, como tornos, trades, esmeril, etc., e por suposto as ferramentas
especializadas como escariadores, brocas adaptadas, etc.
Todo isto para conseguir un resultado final que non é tanto a construción do instrumento (que tamén) como a adquisición da competencia necesaria para poder poñer en funcionamento o noso propio obradoiro artesán.
Por parte do alumnado será necesaria a achega de ferramenta de man (coitelas para tornear, trencha, navalla, etc.) que serán de uso exclusivo polo propietario, tamén achegará os materiais necesarios para a elaboración do instrumento (madeiras, cortizas, anelas), e, loxicamente as EPIS individuais necesarias, que serán de uso obrigatorio.

A continuación déixovos unha pequena mostra do que poderás ter conseguido cando remates os estudos.