Adeus a Juan Genovés [DEBUXO]

A fin de semana pasada, escoitando e vendo as noticias entereime de varios falecementos de persoas relevantes  na  historia que é posible que sen a súa existencia o mundo non fose o mesmo. Faleceu Rafael Gómez Nieto, o último supervivinte da mitica "La nueve". Faleceu  Astrid Kirchherr, a fotógrafa dos Beatles que os retratou en Hamburgo cando aínda non eran iconos da música e cando nas súas filas tocaba o prometedor pintor Stuart Sutcliffe. Se non coñecedes a historia recoméndovos esta película do 94, Backbeat.

Morreu Cécile Rol-Tanguy a resistente francesa que liderou a insurrección de París contra o nazismo no 1944. Faleceu tamén  Julio Anguita que será recordado polo seu discurso de esquerda pausado e contundente...

JUAN GENOVÉS

....e morreu un grande da nosa arte, un imprescidible da pintura do noso tempo, Juan Genovés, ao que hoxe recordamos.

O ano pasado nun deses fantásticos Imprescindibles da 2 , que recomendo fortemente, fixéronlle un monográfico precioso que é momento de voltar a ver.

IMPRESCINDIBLES: JUAN GENOVÉS

Genovés deixa imaxes icónicas dun momento fundamental da nosa historia recente. Retratou a transición española nun cadro, "El abrazo" (1976),  que representa a solidariedade e unidade do país e que hoxe habería que reivindicar.

Acrílico e serigrafía. 151 X 201 cm. Museo Reina Sofia

"El abrazo" foi a imaxe dunha campaña de Amnistía Internacional durante a transición, coa que se fixeran 500.000 cartaces, e posteriormente utilizouse para homenaxear nunha escultura aos avogados laboralistas asasinados en Atocha no ano 1977.

A multitude e o individuo en soidade serán o leitmotiv da súa obra cando nos 70 entra en contacto cos movementos de oposición ao réxime franquista... a manifestación, as carreiras ás escapadas dos grises resultan unha crónica perfecta da España convulsa e incerta da época. Un compromiso social e político que non abandonou cos anos e que plasmou nas multitudes de xente que resultan enigmáticas.

Augaforte sobre papel. 1972

Na acumulación de xente que aparece na súa obra fala do poder da colectividade fronte ao individualismo... o poder da sociedade.

Grazas Juan Genovés pola túa ilusión, o teu compromiso e a fantástica obra que nos deixas. Canto temos que aprender de ti. Agora máis que nunca ler as túas reflexións, ver a túa pintura os teus debuxos resulta inspirador.

E agardamos retomar as nosas vidas para poder reunirnos nas rúas, fundirnos en apertas e bicarnos novamente, ser coma un dos teus cadros... porque hoxe non se pode.

ENTREVISTA. OCTUBRE 2019