Hoxe continuamos coas entradas dedicadas ao noso fondo
histórico, concretamente a algunhas das publicacións periódicas máis
interesantes que se conservan na nosa hemeroteca histórica.
La ilustración artística : periódico semanal de literatura, artes y ciencias / redactado por notables escritores nacionales.-- Barcelona : Montaner y Simón, 1882-1916
Inicia a súa andaina o 1 de xaneiro de 1882 a cargo da casa editorial barcelonesa Montaner
e Simón, como agasallo aos subscritores da Biblioteca Universal
Ilustrada, colección de novelas, ensaios e libros de viaxe de autores
clásicos.
De periodicidade semanal, caracterizouse desde o primeiro momento pola
súa coidada edición, tanto en continente como en contido. En relación ás
materias tratadas, basta con dar conta do subtítulo descritivo da
publicación, “Periódico Semanal de Literatura, Artes e Ciencias”.
Esta publicación tivo unha gran difusión tanto na península como en Hispanoamérica, estaba profusamente ilustrada, primeiro a base de xilografías ou galvanotipos e despois con fotogravados e fotografías. Tal como sinala na portada dos seus tomos, ademais de estar “adornada
cunha magnífica colección de gravados debidos aos primeiros artistas
nacionais e estranxeiros”, estivo redactada polos “máis notables
escritores nacionais”, entre os que se atopaban Emilio Castelar, Leopoldo Alas "Clarín", José Echegaray, José Ortega y Monilla, Giner de los Ríos, Madrazo, Emilia Pardo Bazán, Menéndez Pelayo, Valle Inclán, Pérez Galdós, entre outros moitos.
Deu conta dos principais acontecementos europeos e mundiais e dos
conflitos bélicos, como as guerras cubana, ruso-xaponesa e a primeira
mundial, con textos acompañados de numerosas fotografías.
Cada tomo anual da súa colección inclúe un índice de autores e gravados. Deixou de publicarse a finais de decembro de 1916.
Boletín de la Institución Libre de Enseñanza.-- Madrid : Institución Libre de Enseñanza, 1877- 1936
O Boletín de la Institución Libre de Enseñanza coñece dúas épocas de
existencia. Períodos delimitados polos acontecementos da nosa guerra
civil. A primeira e máis importante vai de 1877 a 1936 e a segunda é
relativamente recente, reaparece en 1987 e edítao a Fundación Francisco
Giner dos Ríos.
O Boletín constitúe unha fonte documental valiosísima e
imprescindible para o estudoso da Institución Libre de Enseñanza e tamén
para quen queira profundar na evolución da Historia da Educación
Española de finais do século XIX e comezos do XX.
Converteuse nunha publicación singular no mundo editorial español polo
seu carácter cosmopolita e multidisciplinar e pola gran calidade dos
seus colaboradores. Pedagogos, investigadores, filósofos e literatos; entre eles, Bertrand Russell, Henri Bergson, Charles Darwin, John Dewey, Santiago Ramón e Cajal, Miguel de Unamuno, María Montessori, León Tolstoi, Rabindranaz Tagore, Juan Ramón Jiménez, Gabriela Mistral, Benito Pérez Galdós, Emilia Pardo Bazán, Azorín, Eugenio D' Ors...
A nosa biblioteca conserva os publicados entre 1882 e 1912.
Gazette de beaux-arts : courrier européen de l´art et de la curiosité.-- Paris : Gazette des beaux-arts, 1859-2002
Esta publicación foi durante 143 anos unha referencia mundial sobre a historia da arte. Fundada en 1859 por Charles Blanc
que definiu este proxecto editorial como unha empresa enciclopédica
dirixida á diversificación dos métodos e obxectos da "crítica da arte". Creou unha rede de correspondentes por toda Europa. Só viu
interrompida a súa publicación durante algúns anos da Primeira e Segunda Guerra Mundial. Esta revista incluía nas súas páxinas ilustracións e gravados e a partir de 1929 tamén resumos en
inglés.
Na biblioteca conservamos encadernados os números publicados entre 1900 e 1908.
The Studio : an illustrated magazine of fine & applied art.-- London : Offices of The Studio, 1893-1964
Fundada por Charles Holme foi unha das revistas inglesas
máis respectadas e influentes, incluía extensos artigos ben ilustrados,
sobre todos os aspectos das artes plásticas e artes decorativas.
Cada número contiña un resumo das últimas tendencias artísticas,
informes sobre exposicións recentes e recensións de libros. Esta publicación resulta unha ferramenta imprescindible para a investigación histórica de movementos estéticos como o Art Nouveau, o Arts and Crafts, os primeiros días da Bauhaus, o florecemento do cartel, a arte da Primeira Guerra Mundial, a xénese do Art Dèco, as influencias de Xapón, as grandes exposicións internacionais...
A partir de 1906, The Studio publicou un anuario, Year Book of Decorative
Art, que trataba sobre arquitectura, deseño de interiores e deseño de
mobles, iluminación, cristalerías, téxtiles, carpintería e cerámica.
Na biblioteca temos esta publicación desde febreiro do 1899 a decembro
de 1929.
Ningún comentario:
Publicar un comentario
¡Anímate a participar cos teus comentarios!