Encaixe de palillos ou a liberdade do confinamento. Cap 29. ANNE MONDRO [ENCAIXE DE PALILLOS]

Sei que esta artista que hoxe vos presento non é encaixeira (pero podería selo), pero quero mostrala para mostrarvos a importancia do material e como dende a nosa especialidade poderíamos desenvolver un traballo volumétrico, mostrar como o material cambia todo e sobre todo a percepción que temos de traballos e artes coma a nosa. Anne Mondro, realiza o seu traballo coa ferramenta do crochet/gancho suscitando novas ideas e cambiando a propia idiosincrasia do crochet.

É importante  que comprendamos que tanto a nosa técnica encaixeira coma outras técnicas relacionadas co mundo feminino evolucionan a ámbitos artisticos ofrecendo novas visións do mundo e da propia esencia humana.

Anne Mondro. Instalación

O latexo. Anne Mondro

Xa que esta semana falamos de artistas que "xogan" co metal, Mondro traballa con fíos metálicos e dálles vida propia.

Anne Mondro recibiu o seu BFA no College for Creative Studies de Detroit e completou o seu MFA na Kent State University antes de mudarse a Ann Arbor, Michigan, para continuar a súa carreira como artista e profesora na Universidade de Michigan.

A súa obra explora a complexidade física e emocional do corpo humano. Integrando artesanía tradicional, belas artes e tecnoloxía dixital, crea imaxes e esculturas que investigan a humanidade.

Mondro mostrou o seu traballo creativo en varias exposicións nacionais, incluíndo The Edges of Grace: Provocative, Craft Incommon in the Fuller Craft Museum e Life Insight: The Human Experience no Kentucky Museum of Art. Actualmente o seu traballo está en exhibición en Love Lace: Exposición Internacional de encaixes en Sydney, Australia.

A súa obra foi amosada en exposicións en solitario no Urban Institute of Contemporary Art, ARC Gallery de Chicago, Museo Internacional de Ciencias Cirúrxicas, Galería PIU en São Paulo e Galería Ceres en Nova York.

Ademais da súa práctica en estudo, Mondro ofreceu numerosas clases e talleres de artistas. Estes incluíron presentacións no departamento de imaxes de moda na Universidade Ming Dao de Taiwán, a 16ª Conferencia Anual da Sociedade para as Artes en Saúde e o Colexio de Arte e Deseño de Kendall.