O outro Antonio López [DEBUXO]

Vai para tres anos que nos programas de Monográficos ofertados pola EMAO, o obradoiro de Moda e o de Debuxo desenvolvimos un monográfico dedicado ao debuxo e á moda. Tratamos o tema do figurín, da proporción e da estrutura. Posteriormente, ese mesmo ano, rematamos con outro monográfico no que traballamos a cor e as texturas das teas e os acabados das pregaduras.

Daquela houho que preparar unha boa contextualización histórica destacando aqueles ilustradores de moda máis notables, e que son moitos, como Barbier, René Gruau, Bernard Blosac e un grande da escena neoyorquina dos anos 70, Antonio López. Este autor foi un descubrimento para min. Gústame o lugar e o momento, ese lugar multicultural onde  estaba o centro do mundo artístico. Aquilo non era USA, era como dicía Tomi Ungerer, unha cidade de exiliados culturais.

Estudio de Antonio López en Carnegie hall 

E por alí andaba Antonio López a finais dos 60, 70 e dos 80, revolucionario, innovador, personaxe cunha maxia especial e posiblemente o ilustrador de moda máis influente dos últimos 50 anos. Se facemos un percorrido polo seu traballo atopamos estilos diferentes e recoñecibles de cada década. El inspirou cada unha destas estéticas.

Ilustración do ano 1967 na época do Max Kansas city

Max kansas city

De orixe portoriqueña chega coa súa familia a Nova York con 7 anos. O seu pai era fabricante de maniquís e a súa nai modista.  Estes alimentan o talento de Antonio para dedicarse á moda e á arte. En 1955 gradúase na Escola de moda Taphangen en ilustración. Posteriormente no instituto de Moda e Tecnoloxía coñece ao que será o seu colaborador e parella Juan Eugenio Ramos. Este exercerá de director artístico facendo que as ilustracións de Antonio cobren unha dimensión máis artística vinculada coa arte moderna.  A partir de 1962 a parella comeza a colaborar na revista de moda Woman´s Wear Daily WWD e posteriormente para unha sección do New York Times pero de xeito independente. Iso facilita que poidan traballar para outras publicacións como Vogue. A partir dese momento comeza o despegue.

Ilustración de 1968

Nos anos 70 terán a súa época parisina e colaborarán con Karl Lagerfeld cando este traballaba para Chloe. Antonio e Juan foron unha influencia creativa importante para Karl Lagerfeld. Antonio tamén coñece na cidade da luz a Jesica Lange, a Jerry Hall  e a Grace Jones antes de ser actrices coñecidas e as converte nas súas musas establecendo unha relación de complicidade e fraternidade chea de sexo, drogas, música e moito, moito glamour.

 Eija Vehka Ajo como modelo en 1972

En París achegan o étnico nas súas ilustracións. A revista Elle entende esta mensaxe mentres que en Nova York Vogue era reacia a introducir modelos negras nos debuxos.  Eles traballarán con mulleres de diversidade étnica como Patt Cleeveland  o Tina Chow en Xapón. Resultará unha ruptura no mundo da moda do que xa non houbo volta atrás.

Ilustración coa modelo Grace Jones

A mediados dos 70 volven a Nova York. No ano 82 Antonio cae enfermo de SIDA e fará unha campaña para Oscar de la Renta xa ao final da súa vida. Falece en 1987 cando presentaba unha colección en Los Ángeles.

Ilustración dos 80 para Oscar de la Renta

Portada de Vogue de 1984 cos deseños de Norma Kamali

Unha noite, non moito despois de rematar aqueles monográficos na NOCHE TEMÁTICA da 2, atópome cambiando as canles do televisor  cun documental dedicado a Antonio López, o ilustrador e icono da moda que tanto achegou á gráfica neste eido.
Deixo este documental co que descubriredes un grande ilustrador,  moi recomendable para o alumnado dos grupos Superiores que están traballando o corpo. Espero que vos guste, a min paréceme sensacional, non só polos debuxos que veredes senón polo contexto, a liberdade do momento que viviron e que eles, os seus protagonistas, tamén fixeron posible.

DOCUMENTAL ANTONIO LÓPEZ

...e un pouco de música como BSO desta entrada e que vén moi a colación.