EMAO EN LIÑA: Proxecto Duli [DEBUXO]

xoves, 11 de xuño de 2020

Proxecto Duli [DEBUXO]

Cando escoitei a palabra cabezabuque non sabía o seu significado nin a que se refería. A alumna Duli Meiga foi a primeira que me falou deste termo, xa que o seu proxecto de Debuxo consiste na realización de cabezabuques co fin de personalizar roupa e complementos.

1 .CABEZABUQUES: MARIQUITAS: PAPER DOLLS

Trátase de personaxes recortables de papel que teñen a característica dunha cabeza moi grande e que foron un entretemento na infancia desde o século XVIII. En España popularizáronse na década dos 60 e 70 do século XX e son coñecidas co nome de "Mariquitas" ou "Mariquitiñas". Os ilustradores destas Mariquitas foron os grandes esquecidos xa que as publicacións no viñan firmadas.

Máis sobre a historia das Mariquitas

Foi ao redor de 1700 cando apareceron en Francia as que poderíamos considerar as primeiras "paper dolls". É dicir, figuras articuladas de papel con diferentes traxes, chamadas "papins", usadas para ridiculizar á alta sociedade. Fixéronse moi populares no século XIX. Representaban a personalidades da época tanto políticas como do mundo do espectáculo. No século XX o ilustrador Tom Tierney recupera esta "arte perdida" segundo apuntaba o New York Times, dándolle un novo carácter estético máis glamuroso enlazado co mundo da moda, do cine e do espectáculo.

TOM TIERNEY

Outra autora neste eido é Judy M Johnson, que desde 1984 ilustra libros de recortables para diversas revistas e editoras en EEUU, como B Shackman. Ela define as monecas de papel como "figura bidimensional debuxada ou impresa en papel para a cal tamén se confecciona roupa e complementos que a acompañan"

JUDY M JOHNSON

2. A PRENDA DE ROUPA PERSONALIZADA

Por outra banda, e como segunda motivación da nosa protagonista de hoxe, temos que falar de moda e de como a arte das imaxes chega ao mundo do vestido. A súa orixe atópase na contracultura urbana no século XX. A motivación por pertencer a un grupo diferenciado, "tribo urbana", como fixeran os distintos grupos de moteiros que apareceron trala Segunda Guerra Mundial en USA, obrigábaos a destacar facendo o seu propio uniforme e logotipos diferenciadores. A historia das bandas de moteiros comezou na cidade de Hollister (California) no ano 1947 e queda relatado na película Salvaxe, "The Wild One", adaptación da novela de 1951 The Cyclists´Ride.

Fotografía de Dan Winters para a revista Squire

A relación da roupa personalizada coa "nova xuventude" do mundo anglosaxón vincúlase pois co das motos e a música. A xuventude dos 60 quere romper cos convencionalismos sociais tan enraizados nas sociedades puritanas da época. A estética ben diferenciada cos cabelos longos e a roupa feita por un mesmo toma cabida nun momento de cambios sociais e culturais. Cos hyppies nace o concepto de "faino ti mesmo", DIY (siglas de DO IT YOURSELF), comezado un novo estilo de roupa e complementos artesanais coloristas e cargados de simboloxía pacifista.

Janis Joplin co seu famoso Porsche personalizado

Nos 60 a personalización da roupa dos coches... dos obxetos, chega para quedarse, pero sempre vinculado á xuventude e á música.
Os punks son outro exemplo de grupo urbano diferenciado pola roupa que visten e a música que escoitan. No Londres dos anos 70 Malcon McLaren e a súa compañeira Vivienne Westwood serán os responsables desta estética nada na tenda que chamaron "SEX" e onde exhibían e vendían os deseños de extravagante evocación transgresora.

Malcon e Vivienne coa súa creación

Maís sobre SEX e o inicio da estética punk

Clásica chupa punk

Posteriormente haberá múltiples variacións e grupos diferenciados como o Pop-punk, o Hardcore e moitros outros... proliferando as chapas, os parches, os engadidos doutras teas, toda unha diversidade e liberdade acotada por un amor incondicional á música que escoitan e da que os mozos se senten protagonistas... é o seu momento. Cada peza de roupa é unha obra de arte, xa que é unica e está contando unha historia persoal, está falando do seu dono, das pasións deste, do seu lugar na sociedade. É un xeito de revelarse a través da imaxe e da estética.

Nos anos 70 e 80 os Mods tiveron o seu momento. Sting na película Quadrophenia

3. PROXECTO DE DULI

Todos estes ingredientes a nosa protagonista Duli Meiga méteos na cocteleira, enche todo de contido pop e remove ben. O resultado é un proxecto de debuxo diferente, no que o soporte da imaxe é a roupa e a imaxe está realizada con tea e fío en collages traídos dos recortables estilo "mariquita". Previamente hai un traballo de deseño, de debuxo, de pensar nas partes que levará o personaxe deseñado para que encaixen perfectamente. Son deseños sinxelos pero ben collidos e ben identificables, nos que Duli pon de manifesto os seus gustos e preferencias, falando en primeira persona a través da prenda ou o complemento. Duli non pertence a ningunha tribo urbana, aínda que toca o contrabaixo e ás veces semella un pouco rócker... pode que como Malcon e Vivienne estea desenvolvendo un novo movemento... sería interesante que empezases a buscar unha banda sonora para estes deseños. Agardo que me personalices o abrigo do que falamos... eu poño a música.

ALGUNHAS IMAXES