Rosie McGuinness [DEBUXO]

Nas últimas entradas colámonos con Duli nos ropeiros dos moteiros dos 50 e 60, do Hyppismo e do Punk. Logo paseamos  polas noites das discotecas neoirquinas e parisinas dos 70 coa compaña de Antonio López . Descubrimos como a moda, a ilustración e a cultura pop están moi vinculadas e se retroalimentan, todo acollido baixo un paraugas chamado Arte, ARTE con maiúsculas. Hoxe  imos achegarnos a Londres para coñecer a Rosie McGuinness, seguindo no mundo da moda e da ilustración... unha ilustración realizada á man na que a súa potencia reside no debuxo a liña ou trazo e na composición.

Ilustración de McGuiness

McGuines, sendo unha ilustradora nova, do noso tempo e en activo, bebe das augas dos clásicos do século XX aos que sempre nos achegamos e que os amantes da arte non nos fartamos de ver, eses clásicos xa convertidos en iconos pop pola industria, xa aceptados e citados moitas veces. Modigliani e Matisse atópanse aí, na obra de Mc Guinness... recoñecibles, recorrentes, universais.

Modigliani

Por iso estas ilustracións de McGuinness entran tan ben, lense tan ben, porque dalgún xeito recoñecémolas, é como se xa as vísemos antes, teñen algo de famliar e están ben traídas ao noso século. A referencia a Modigliani e a Matisse sempre funciona porque as súas obras atópanse no noso imaxinario colectivo. Recorrer a eles é un acerto porque son imaxes sinxelas e o sinxelo funciona.

Ilustración de McGuiness

Pero para ser quen de transmitir un momento, de facer chegar unha idea con algo sinxelo tes que demostrar un gran dominio da linguaxe visual e moito criterio e intuición. Ás veces non é necesario dicir moito máis, debuxar moito máis... hai que deixar pensar ao outro, facelo partícipe para que complete a idea... establecer un nexo de reflexión mutuo onde o artista só sitúa a saída acompañando ao espectador un momento, para que logo este faga a súa parte.

Debuxo de Matisse

É importante que o espectador demostre unha tácita colaboración co artista para achegarse a estas obras e poder establecer ese diálogo. O ilustrador necesita de observadores intelixentes que respondan á proposta.
McGuiness entende moi ben isto cando debuxa. Leva esa simplicidade ao debuxo de moda e consegue personaxes moi cool, individualistas, impenetrables, hedonistas, un pouco Warholianos, moi do século XXI. A ilustación de moda sempre tivo eses caracteres, atribuídos ao bo gusto. Agora tamén vemos mulleres que transmiten forza e non delicadeza, mulleres que se agradan a si mesmas sentíndose ben e donas do seu destino.

Fixádevos na simplicidade do trazo, nas amplas manchas de negro, na resolución sinxela das texturas e na organización do espazo de traballo. Agardo que estas ilustracións sexan inspiradoras para o alumnado dos grupos Superiores na realización dos vosos traballos de corpo humano. Recordade que recorrer e citar obras de artistas presentes na nosa memoria de lectores de imaxes, como fai McGuiness, é un recurso que funciona.

ILUSTRACIÓNS DE McGUINNESS