Madeiras: Quebracho Branco (aspidosperma quebracho-blanco) [CAIM GAITA]

Quebracho branco

(aspidosperma quebracho-blanco)

Hoxe imos falar dunha madeira que desgraciadamente non poderemos empregar normalmente, xa que comercialmente, polo de agora, aquí non a podemos atopar, ou polo menos eu aínda non a conseguín. Recentemente teño feito algun pito pastoríl con ela, conseguida de xeito extracomenrcial, cuns resultados realmente asombrosos en canto á calidade sonora.

Aqui falamos do quebracho branco, aínda que existen outras variedades, como o quebracho colorado, un pouco máis duro e con gran concentración de taninos, o que fai que se utilize na curtiduría vexetal do coiro.


O quebracho branco (aspidosperma quebracho-blanco), tamén coñecido como quebracho chorón, pertence á familia das apocináceas, unha familia de árbores grandes, que na súa maioría habitan en zonas tropicais e subtropicais, e son amplamente utilizados na industria farmacéutica.

Tamén pode crecer en rexións máis templadas, e é por este motivo que o podemos atopar formando parte da flora autóctona do Uruguai.

Detalle da folla

Características
Esta árbore é facilmente identificable porque ten un tronco recto e a súa copa está moi separada do chan. O tronco mide entre doce e quince metros de altura e pode chegar a alcanzar un metro de diámetro. A cortiza é bastante rugosa e presenta unha cor entre castaña e ocre. A madeira é dunha cor amarelo-rosácea e con pouco veteado.

Tamén as súas follas teñen unha característica particular, dende a punta destas medran espiñas de case un centímetro de longo, que son tan fortes que poden atravesar a carne coma unha agulla. É de folla perenne, é dicir, non perde a follaxe durante o inverno.

Corte da árbore onde se aprecia a
diferenza entre o sámago e o cerne

As flores son de cor amarela clara, miden entre oito e dez centímetros de longo e desprenden un perfume suave. O froito é de cor verde grisácea e mide entre sete e doce centímetros de longo.

Usos e propiedades
A madeira do quebracho blanco presenta un veteado pouco marcado, é pesada, resistente e dura, mais tamén é agradecida para traballar e puír.

Pito en SOL
madeira de quebracho branco

Grazas a estas propiedades ten multitude de usos en carpintería: utilízase para parqués, mobles, vigas, postes, revestimentos, perchas, pezas de xadrez, estribos de montura, esquís, tacos e formas de zapatos, entre outros. Nos últimos tempos estase empregando para a construción de instrumentos musicais, preferiblemente de vento, cuns resultados sonoros espectaculares Ademais, é boa como leña e carbón.

No que se refire ás súas propiedades medicinais, a cortiza, pólas e raíces do quebracho branco teñen funcións antioxidantes, utilízanse popularmente para combater a tose, a febre, a bronquite e a asma.

Na época das misións xesuíticas en América, cocíase a cortiza para empregala contra a febre causada pola malaria.