Bad Rice [CERÁMICA]

Ron  Nagle é coñecido polas súas esculturas a pequena escala, cada unha composta de elementos cerámicos moldeados, abiscoitados e cunha decoración híbrida que combina a utilización de esmaltes cerámicos e diversos acabados e frío como son distintos tipos de resinas e estucos. A aerografía xoga un papel importante na súa aplicación. A pesar da  tridimensionalidade do traballo, Nagle explica que "todo se fai, mesmo inconscientemente, desde un punto de vista plano". As esculturas de Ron Nagle mesturan o encanto e a  repulsión, xerando un efecto enigmático, froito dun sentido do humor  irreverente.

Nagle naceu en San Francisco en 1939. Comezou a traballar coa cerámica durante a década de 1950 como estudante de secundaria. En 1961 foi aprendiz de Peter Voulkos na Universidade de  California, Berkeley, e logo exhibiu o seu traballo xunto a Voulkos, Ken Price e outros artistas innovadores da costa oeste que traballan en arxila. A súa obra está inspirada en artistas como Giorgio Morandi, Lucio Fontana, Phillip Guston e George Herriman, e en formas tan variadas como a cerámica xaponesa Momoyama e os monumentos funerarios hawaianos.

Con todo, fóra do mundo da arte visual, tamén é coñecido como un prolífico compositor cun bo número de vinilos editados, entre os que se atopa Bad Rice, do que toma o título esta entrada. Atribúeselle a escritura de cancións  icónicas en álbums de Jefferson Airplane, Sammy Hagar e Barbra Streisand, así como a creación de moitos dos efectos de son en "The Exorcist".