Cando unha gran firma peta na túa porta: Carlos Graña e Loewe [TALLA E ESCULTURA]

    Hoxe quérovos presentar a un exalumno da aula de Escultura e talla, un exalumno que ten moi pouco de ex, xa que seguimos tendo contacto e de cando en vez déixase caer pola Escola para charlar sobre proxectos nos que anda liado. Carlos Graña, que así é o seu nome, acabou na nosa aula hai xa máis de dez anos. Antes de matricularse na aula de Talla e escultura, a Carlos dáballe polo debuxo, pero cando descubriu o manexo das ferramentas e conseguiu dar forma á madeira xa non o deixou. 

Carlos traballando no seu taller

    Houbo un tempo en que combinaba a arqueoloxía, que era co que se gañaba a vida, e facer algunha peza para ir a feiras pequenas de artesanía como a "Arde o Pazo",  pero foi coa crise ao  rematar o das  escavacións cando decide dedicarse plenamente á artesanía.

    A partir de aquí solicita a carta de artesán e comeza a ir ás feiras máis importantes, como a da "Reconquista", onde facía exhibicións. Pouco despois decide profesionalizarse e solicita a  AGA (Asociación de artesáns de Galicia) a marca de autor, #verdecima (así é o nome do seu taller en Mos) para poder asistir a todas as feiras avalado pola etiqueta "Artesanía de Galicia".  Un alumno brillante que tiña moi claro ao que quería dedicarse, sabendo que non era nin é un camiño fácil.

 Paxariño realizado por Carlos para a marca Loewe

     Por que vos conto isto, preguntarédesvos, pois porque un día polo 2018, ao volver da feira de "A  Golada", Carlos recibe unha chamada: un representante da marca de luxo Loewe estaba interesado no seu traballo, segundo parece vírao na feira e gustoulle o que facía. A partir de aí contactan e Carlos ten que asinar un documento que o acredita como artesán provedor de Loewe; algo difícil  de conseguir como vos podedes imaxinar. Encárganlle dúas pezas, unha cabeza de pato que era unha tabaqueira e un paxariño  chaveiro. Estas pezas foron expostas en Milán con outra selección de obxectos de distintos materiais doutros artesáns que  Loewe seleccionara, e en distintas tendas da marca.

Loewe é unha marca de luxo que aposta polo traballo da artesanía, no so facendo promoción dende a súa Fundación Loewe, senón realizando un dos certámenes máis pretixiosos, Loewe Craft Prize.

Así que hoxe quixen facer esta entrada para facer visible o traballo dos nosos alumnos fóra da Escola, xa que estamos moi orgullos@s dos vosos logros e éxitos. Parabéns Carlos!!!

Algúns dos traballos de Carlos Graña  #verdecima

...