Punto [DEBUXO]

Para o alumnado dos grupos de Iniciación e Básico, hoxe continuamos cos acabados a estilógrafo sobre debuxo de zapato. Como sabedes, en cada exercicio limito o útil e o modo de aplicalo co fin de que lle saquemos o máximo partido, aprendendo deste xeito a dominar, tanto o útil como a técnica.
Hoxe imos limitar o uso do estilógrafo á aplicación do punto. Xa fixeramos unha proposta práctica relacionada co punto nos cadros de texturas visuais.

Cadro de texturas utilizando puntos

Se non a tedes realizada aínda, ou pensades que se pode mellorar, comezades por esta tarefa. Se xa a tedes realizada, podedes seguir argallando un pouco coas posibilidades das liñas realizando outras texturas. Deixo varios exemplos doutros anos.

Utilización da liña. Textura e escala

COMEZAMOS OUTRO ZAPATO

Para a realización do exercicio proposto seguiremos os seguintes pasos:

1. Debuxo un zapato, zapatilla deportiva ou calquera outro calzado, do mesmo xeito que fixeramos os anteriores exercicios utilizando o lapis HB. Buscade unha posición atractiva. Evitade as posicións de perfil.
2. Cando remate co lapis o zapato, comezo o rotulado do contorno e o límite das formas, como realizamos no primeiro traballo de zapato. Utilizo o 0.2 ou 0.4.
3. Sitúo o zapato na mesma posición, ilumino cun foco e fago un estudo das luces e das sombras, pensando e situando co lapis os medios, os claros e os escuros
4. Comezo o punteado tendo presente a valoración dos tons realizada anteriormente. Intentade sacarlle o máximo partido a este recurso.

Deixo dous exemplos doutros anos para que vexades os acabados que podemos conseguir.