O que vexo desde a fiestra [DEBUXO]

Para o alumnado do grupo Medio a tarefa de libreta para a próxima semana é:

"O que vexo dende a fiestra"

Como non saímos moito da casa e achegámonos coma nunca ás fiestras e aos balcóns, propoño que debuxedes esa vista agora tan familiar. Deixo como exemplo un debuxo realizado por min estes días. Como observades collo uns elementos concretos, non pretendo abranguer todo o espazo, fago un zoom e concéntrome nunha parte co fin de acadar unha composición equilibrada.

É fundamental que concentredes os vosos esforzos en resolver con criterio e pensando cada paso:

1. encadre
2. proporción
3. perspectiva

O nivel de acabado déixoo ao voso criterio. Eu procurei non superar os 40 min na sesión, chegado ese tempo deixeino, logo fixen uns pequenos retoques, como o rotulado de liñas da sombra do chan e o remate de follaxe. Podería rematalo un pouco máis pero considerei que como apuntamento chegaba.

Deixo os pasos do proceso:
1.




Comezo encaixando co lápis. Penso ben o que quero debuxar e relaciono partes para proporcionar valorando ben que a escena "ENCAIXE" no meu espazo de traballo. Trátase dunha aproximación, non rematedes e traballedes en exceso co lápis.

2.

Rotulo contornos xa fixándome nos espazos de sombra que vou marcando. Procuro ser preciso neste rotulado.

3.

Agora a disfrutar da liña-trama e facer pequenas correcións e "trampeos" de perspectiva que se me colaran. Non vou dicir cales.

4.

Remato. Aquí o nivel de acabado é libre. Eu sempre procuro poñer un tempo de execución e non excederme dese tempo.

Material: 

Neste caso utilicei o lápis HB a pluma xaponesa e o block GrafBook de 100gr de Clairefontaine formato 19 X 25.